O goberno galego busca complementar con esta iniciativa a campaña ‘Camiño da Reciclaxe', presente nos hostais e albergues do Camiño de Santiago, cuxo obxectivo é concienciar aos miles de peregrinos da importancia de evitar o lixo na natureza e nos diferentes itinerarios do Camiño de Santiago e de darlle unha nova vida a un refugallo, a través da reciclaxe e da recuperación.
Durante 2020 recolléronse 71.130 toneladas de envases lixeiros e de papel-tarxeta na Comunidade; é dicir, cada galego depositou, de media, 14,6 quilos de residuos no contedor amarelo e 14 quilos no de cartón, case dous quilos máis en total que no ano anterior. Co obxectivo de seguir avanzando cara unha Galicia máis sostible e verde, a Xunta e Ecoembes estableceron unha nova colaboración destinada ao sector turístico, que se prevé alcance máis de 8.000 establecementos. A través desta colaboración entregaranse ás empresas turísticas illas e contedores para envases lixeiros e papel-tarxeta , así como impartirase formación en materia de sustentabilidade e cambio climático.