O martes 17 de setembro ás 11.00h celebrouse na sala de prensa do Concello de Lalín unha xornada de presentación e seguimento da Oficina Técnica do Pacto dos para o Clima e a Enerxía, organizada pola Xunta de Galicia a través da Dirección Xeral de Calidade Ambiental e Cambio Climático da Consellería de Medio Ambiente, Territorio e Vivenda.
O evento tivo como obxectivo principal proporcionar aos concellos información de interese sobre que é o Pacto dos Alcaldes, os obxectivos a acadar e os compromisos que asume cada concello coa súa adhesión. Así mesmo presentáronse os avances da Oficina Técnica de Pacto dos Alcaldes, instrumento financiado pola Xunta de Galicia e coordinado dende a Dirección Xeral de Calidade Ambiental e Cambio Climático, para asesorar aos Concellos na súa adhesión e na elaboración do seu Plan de Acción polo Clima e a Enerxía Sustentable- PACES.
Durante o evento contouse coa intervención do Alcalde do Concello de Lalín, D. José Crespo Iglesias, que deu a benvida aos preto de 30 asistentes procedentes de diferentes de concellos do interior de Galicia. A continuación, a Directora Xeral de Calidade Ambiental e Cambio Climático da Consellería de Medio Ambiente, Territorio e Vivenda, Dna. María Cruz Ferreira Costa presentou o proceso de elaboración da Estratexia Galega de Cambio Climático 2050 e, do mesmo xeito, incidiu na necesidade de aliñar as políticas municipais coa Axenda 2030. Ademais destacou o compromiso da Xunta de Galicia cos concellos galegos e explicou. os distintos mecanismos a través dos que a Xunta de Galicia presta apoio e asesoramento a través da Oficina Técnica do Pacto.
Por outra banda, D. Julio Sánchez Montoya, representante da Oficina Técnica de Pacto dos Alcaldes, detallou as distintas liñas de axudas que poden solicitar os concellos co obxecto de dar apoio ás accións a desenvolver no PACES. De seguido, D. Antonio Ángel Fraga Sánchez, Primeiro Tenente de Alcalde e Concelleiro de Medio Ambiente, Saúde e Promoción Industrial do Concello de Curtis, introduciu exemplos de como implicar á cidadanía nos compromisos do Pacto de Alcaldes.
Para finalizar, deuse paso a un debate aberto, no que se trataron asuntos de interese directo para os concellos; axudas públicas para a elaboración do Pacto dos Alcaldes polo Clima e a Enerxia, relación entre o sector agrogandeiro e as accións de mitigación e adaptación e cuestións técnicas na elaboración do inventario de emisións de referencia IER.
Ademais, infórmase do novo calendario de xornadas a celebrar:
Laxe
1 de outubro ás 11:00h
Salón de Actos da Biblioteca/Casa de Cultura (Rúa Villa Amparo, 23)
Marín
22 de outubro ás 11:00h
Museo Municipal Manuel Torres (Avenida Ourense)
Sober
5 de novembro ás 11:00h
Centro da Cultura (Praza do Concello)
Mondoñedo
12 de novembro ás 11:00h
Centro Comarcal Pazo Santo Tomé (R/ Xulia Pardo, 13) (MODIFICADA)
Cambre
19 de novembro ás 11:00h
Villa Concepción (Praza Vila Concepción, 1) (NOVA XORNADA)