A iniciativa, que estará aberta ata o 23 de febreiro de 2026, busca incorporar aportacións de cidadáns, empresas e autoridades para afrontar os desafíos do cambio climático e fortalecer a preparación europea ante fenómenos extremos
A Comisión Europea lanzou unha consulta pública dirixida a toda a sociedade (cidadáns, empresas, organizacións e autoridades) co obxectivo de recadar ideas e propostas que contribúan a definir o futuro marco europeo de resiliencia climática.
A consulta, promovida pola Dirección Xeral de Acción Climática da Comisión, estará aberta ata o 23 de febreiro de 2026 e forma parte dos preparativos para a elaboración dunha política integral que permita á Unión Europea anticipar e responder de maneira eficaz aos riscos derivados do cambio climático.
Europa xa experimenta con maior frecuencia os efectos de fenómenos meteorolóxicos extremos como ondas de calor, secas e inundacións. Neste contexto, a consulta pretende asegurar que as futuras políticas reflictan as necesidades e prioridades de todos os sectores afectados.
O marco de resiliencia climática que se deseñará a partir das achegas recibidas busca fortalecer a acción coordinada na UE, anticipar os riscos climáticos, protexer o benestar das persoas e promover tecnoloxías, produtos e servizos que aumenten a capacidade de adaptación ao clima. A nova política europea, prevista para adoptarse cara a finais de 2026, dará continuidade ás iniciativas existentes e complementará ao Pacto Verde Europeo.
Esta consulta pública ofrece ás partes interesadas e á cidadanía a oportunidade de participar achegando comentarios, suxerindo ideas e contribuíndo á elaboración da nova política de resiliencia climática da UE.
Anímate e participa!