A Xunta de Galicia participou no encontro europeo, que reuniu representantes municipais e institucións da UE para abordar os retos da transición enerxética, a resiliencia climática e a cooperación entre os distintos niveis de goberno
O pasado 15 de outubro de 2026, Bruxelas acolleu a Cerimonia Europea do Pacto das Alcaldías polo Clima e a Enerxía, un encontro que reuniu centos de representantes municipais e rexionais de toda Europa, xunto con responsables das institucións comunitarias, para analizar os principais desafíos da acción climática local e reforzar a colaboración entre as administracións públicas.
Baixo o lema «Líderes locais por unha enerxía accesible e a resiliencia climática», a edición deste ano centrouse no papel fundamental das cidades e rexións para avanzar cara a un modelo enerxético máis sostible e accesible, reducir a dependencia enerxética exterior e fortalecer a capacidade dos territorios para facer fronte aos impactos do cambio climático.
O encontro contou coa participación de representantes de alto nivel da Comisión Europea, entre eles Teresa Ribera, vicepresidenta executiva para unha Transición Limpa, Xusta e Competitiva; Raffaele Fitto, vicepresidente executivo de Cohesión e Reformas; Dan Jørgensen, comisario europeo de Enerxía e Vivenda; e Wopke Hoekstra, comisario europeo de Clima, Cero Emisións Netas e Crecemento Limpo.
Galicia estivo representada por Catalina Thomás de Carranza, subdirectora xeral de Meteoroloxía e Cambio Climático da Xunta de Galicia, que participou como relatora nunha sesión de debate dedicada á gobernanza multinivel e á integración do Pacto das Alcaldías na planificación enerxética e climática dos ámbitos rexional e nacional.
Esta sesión reuniu representantes e entidades vinculadas á coordinación e ao apoio do Pacto das Alcaldías para intercambiar experiencias sobre os mecanismos de colaboración entre os distintos niveis de goberno e analizar como reforzar a integración dos compromisos climáticos locais nas estratexias rexionais e nacionais.
O debate abordou especialmente o papel dos coordinadores territoriais e das entidades de apoio do Pacto das Alcaldías, que desempeñan unha función esencial no acompañamento aos municipios para a elaboración, implementación e seguimento dos seus Plans de Acción para o Clima e a Enerxía Sostible (PACES).
Neste contexto, a participación de Galicia permitiu dar visibilidade ao papel das administracións autonómicas no apoio á acción climática municipal e á importancia de contar con estruturas de coordinación e asistencia técnica que faciliten a aplicación dos compromisos asumidos polos concellos adheridos á iniciativa europea.
Ao longo da xornada, os participantes abordaron algúns dos desafíos máis relevantes aos que se enfrontan actualmente as entidades locais, como o incremento dos custos enerxéticos, a pobreza enerxética, a crecente exposición aos riscos climáticos e a necesidade de mobilizar investimentos para executar os compromisos de mitigación e adaptación ao cambio climático.
Un dos eixes centrais foi a importancia de facilitar o acceso dos municipios a recursos financeiros e mecanismos de apoio que permitan transformar os plans climáticos en proxectos concretos, especialmente en ámbitos como a eficiencia enerxética, o desenvolvemento das enerxías renovables, a rehabilitación de edificios e a adaptación dos espazos urbanos aos efectos do cambio climático.
Ademais dos debates institucionais, o programa incluíu sesións de intercambio de experiencias e actividades prácticas centradas en cuestións como a transformación dos PACES en plans de investimento, a loita contra a desinformación climática e o fortalecemento da confianza e da participación cidadá nas políticas locais de clima e enerxía.
Durante a cerimonia tamén se presentou a iniciativa europea Places Made for People, orientada a apoiar as administracións locais na creación de territorios máis habitables, sostibles e resilientes, situando o benestar das persoas no centro da transición climática e enerxética.
As cuestións abordadas durante a cerimonia resultan especialmente relevantes para os concellos galegos adheridos ao Pacto das Alcaldías, que deben trasladar os seus compromisos de redución de emisións, adaptación ao cambio climático e loita contra a pobreza enerxética a actuacións concretas no ámbito municipal.
Neste sentido, a cooperación entre as institucións europeas, as administracións autonómicas e as entidades locais constitúe un elemento fundamental para facilitar o acceso aos recursos, coñecementos e ferramentas necesarios para avanzar na implementación e no seguimento dos PACES.
A Cerimonia Europea do Pacto das Alcaldías 2026 reafirmou así a importancia de fortalecer a gobernanza multinivel e de recoñecer o papel protagonista dos municipios na consecución dos obxectivos climáticos e enerxéticos europeos, promovendo unha transición que responda ás necesidades e capacidades dos diferentes territorios.